Fransiya terma jamoasi va «PSJ» hujumchisi Usmon Dembele «Oltin to‘p»ni qo‘lga kiritgandan keyin uning qalbini eng ko‘p junbushga keltirgan tabrik kimdan bo‘lganini oshkor qildi.

«Men uchun ayniqsa ta’sirchan bo‘lgan tabrik? Bu Lionel Messidan edi. U menga shaxsan yozdi. Shuningdek, “Barselona”dagi sobiq murabbiyim Xavi Ernandes ham yozdi. Ko‘plab sobiq “Barsa” futbolchilari — Luis Suares va boshqalar ham xursand bo‘lishdi. “PSJ” futbolchilari ham tabriklashdi. Ashraf Hakimiy, murabbiy, Luis Kampush va boshqalar tabrik ham yo‘lladi», — deya Dembelening so‘zlarini Goal nashri France Footballga tayanib yozdi.

O‘tgan mavsumda Dembele klub darajasida barcha musobaqalarda 53 ta uchrashuvda maydonga tushib, 35 ta gol va 16 ta golli uzatma qayd etdi. «PSJ» safida u Fransiya chempioni, milliy Kubok va Superkubok, shuningdek, Chempionlar ligasi va UYEFA Superkubogini qo‘lga kiritdi.