Jahon shaxmat federasiyasi (FIDE) sentyabr oyining yakuni bo‘yicha yangilangan reytingni e’lon qildi. Reyting jadvalining kuchli 100 talik ro‘yxatidan O‘zbekistonning 5 nafar grossmeysteri joy oldi.

Reytingda Magnus Karlsen (Norvegiya) 2839 ochko bilan birinchi o‘rinda qolmoqda. Uning reyting ochkolari o‘zgarmagan bo‘lsa-da, yetakchilikni saqlab qoldi. Ikkinchi o‘rinni amerikalik Hikaru Nakamura (2816), kuchli uchlikni esa yana bir AQSH vakili Fabiano Karuana (2789) yakunlagan.

O‘zbekistonning birinchi raqamli shaxmatchisi Nodirbek Abdusattorov 2750 ochko bilan 12-o‘rinni egalladi. Bu avvalgi oyga nisbatan 1 pog‘ona past. E’tiborlisi, u avgust oyida 2748 ochko bilan 11-o‘rinda edi. Garchi ochkolari 2 ballga oshgan bo‘lsa-da, niderlandiyalik Anish Giri reytingda keskin ko‘tarilib, Abdusattorovni bir pog‘ona pastlashiga sababchi bo‘ldi.

Javohir Sindorov esa reytingda O‘zbekistonning ikkinchi raqamli grossmeysteri bo‘lib qolmoqda. U 2721 ochko bilan 24-o‘rinni saqlab qolgan. Uning reytingdagi o‘rni o‘tgan oy bilan bir xil bo‘lsa-da, Sindorovning hisobidagi ballar miqdori 1 ochkoga kamaygan (avgustda 2722 edi).

Nodirbek Yakubboyev reytingda 5 pog‘ona yuqoriladi. Avgustda u 2681 ochko bilan 45-o‘rinda edi, hozir esa 2689 ochko bilan 40-pog‘onaga ko‘tarilib oldi. Tajribali grossmeyster Rustam Qosimjonov 2671 ochko bilan 47-o‘ringa tushgan. U o‘tgan oyda 46-o‘rinda edi. Yana bir o‘zbekistonlik shaxmatchi Shamsiddin Vohidov reytingda 3 pog‘ona pastladi. Hozirda u 2640 ochko bilan 86-o‘rinni band etmoqda (avgustda 83-o‘rin).

FIDE jamoaviy reytingiga ko‘ra, O‘zbekiston Shaxmat federasiyasi 2601 ochko bilan 13-o‘rinni egallab turibdi.