«Inter Mayami» hujumchisi Lionel Messi MLSning muntazam mavsumida eng ko‘p gol urgan futbolchi sifatida “Oltin butsa” sovrini bilan taqdirlandi. Argentinalik yulduz mukofotni pley-off 1/8 finalidagi «Neshvill»ga qarshi uchrashuv oldidan qabul qildi.
Bellashuv Florida shtatidagi Fort-Loderdeyl shahrida joylashgan «Cheyz Stedium»da bo‘lib o‘tmoqda. Hisob — 2:0 «Inter Mayami» foydasiga, gollardan birini Messi urdi.
38 yoshli forvard muntazam mavsumda 28 o‘yinda 29 gol kiritib, eng yaqin ta’qibchilari — «Los-Anjeles» forvardi Deni Buanga va «Neshvill» hujumchisi Sem Sarrijni (ular 24 tadan gol urgan) ortda qoldirdi.
Messi 2023 yil yozidan beri «Inter Mayami» sharafini himoya qilmoqda. Shu vaqt mobaynida u barcha musobaqalarda 82 ta uchrashuvda maydonga tushib, 71 ta gol va 37 ta golli uzatma muallifi bo‘ldi.
Transfermarkt ma’lumotiga ko‘ra, afsonaviy futbolchining hozirgi bozor bahosi 18 million yevroni tashkil etadi.
