Italiya A seriyasining 8-turidan o‘rin olgan markaziy uchrashuvda «Napoli» o‘z maydonida «Inter»ni 3:1 hisobida yengdi. Bellashuv Neapoldagi «Diyego Armando Maradona» stadionida bo‘lib o‘tdi. Uchrashuvga Maurisio Mariani bosh hakamlik qildi.

Hisob 33-daqiqada ochildi — Kevin De Bryoyne penaltini aniq amalga oshirib, neapolliklarni oldinga olib chiqdi. 54-daqiqada Skott Maktominey hisobni 2:0ga yetkazdi. 59-daqiqada Hoqon Chalhanog‘lu penaltidan bitta javob to‘pini kiritdi. Biroq orqadan 66-daqiqada Frank Zambo Angissa uchinchi golni urdi va «Napoli»ning g‘alabasini mustahkamladi.

Bu g‘alabadan so‘ng «Napoli» 18 ochko bilan turnir jadvalida birinchi o‘ringa chiqdi. «Inter» esa 15 ochko bilan uchinchi pog‘onada qoldi.

Kelasi turda «partenopeylar» 28 oktyabr kuni mehmon sifatida «Lechche» bilan to‘qnash keladi, «neradzurrilar» esa 29 oktyabr kuni o‘z maydonida «Fiorentina»ni qabul qiladi.

Italiya — A Seriya. 8-tur
25 oktyabr 2025 yil, shanba. 21:00 (Toshkent vaqti)
Neapol, «Diyego Armando Maradona» stadioni
«Napoli» (Neapol) — «Inter» (Milan) — 3:1
Gollar: 1:0 — De Bryoyne (33', penalti), 2:0 — Maktominey (54'), 2:1 — Chalhanog‘lu (59', penalti), 3:1 — Angissa (66')