«Manchester Yunayted»dagi faoliyati davomida ser Aleks Fergyuson o‘z jamoasida ko‘rishni juda xohlagan futbolchi bor. Ser eng katta afsusi sifatida «Yuventus»dan Alessandro Del Pyeroni sotib ololmaganini aytadi.

Italiyalik hujumchi 2002 yilda, «MYU» «Yuventus» bilan o‘ynaganida Fergyusonni hayratda qoldirgan. O‘shanda mankunianliklar futbolchini sotib olishga uringan, 2006 yilda esa ikkinchi urinish amalga oshirilgan.

«Men «Yuventus» va uning agenti bilan bog‘landim. U mening taklifimni eshitmasdan rad etdi, «Yuventus» uning uchun eng yaxshi joy ekanligini va «Manchester Yunayted»ni hurmat qilsa-da, hech qachon oq-qora ranglarga xiyonat qila olmasligini aytdi. Bu afsuslanarli, chunki unga o‘xshash futbolchini boshqa ko‘rmaganman.

Men unga Italiya Jahon chempionatini qo‘lga kiritganidan keyin ham darhol murojaat qildim (2006 yil). O‘sha paytda «Real» ham uni kuzatayotgandi va «Yuventus» muammolarini hisobga olgan holda, men u uchun biz va «galaktikos» o‘rtasida adolatli kurash bo‘lishini tasavvur qilgandim.

Shuning uchun unga to‘g‘ridan to‘g‘ri qo‘ng‘iroq qildim: «Aleks, seni «Yunayted»da ko‘rishni istardim», dedim. «Sen jamoaning yulduzi bo‘lasan va birgalikda hamma narsani yutamiz». U kulib javob berdi: «Janob, o‘shandan beri hech narsa o‘zgarmaganini bilasiz», – deya esladi Fergyuson.