Shu yilning 13 may sanasida "Andijon"ga bosh murabbiy etib tayinlangan Maksim Shaskixning shartnoma muddati joriy yilning 31 dekabr sanasigacha mo‘ljallangan. Ammo klub rahbariyati murabbiy bilan o‘zaro kelishuvga asosan shartnomani bekor qildi. Bu haqda klub telegram-kanali xabar berdi.

"Biz Maksim Aleksandrovichga jamoamizdagi 6 oylik faoliyati davomidagi mehnati uchun minnatdorchilik bildiramiz. 

Shaskix "Andijon" ustozi sifatida qo‘lidan kelgan barcha ishni amalga oshirish harakatida bo‘ldi va klub rivoji yo‘lida mehnatini ayamadi.

Shaskix "Andijon" bosh murabbiyi sifatida barcha musobaqalarda jami 24 ta o‘yin o‘tkazildi. Shundan 5 g‘alaba, 9 durang va 10 mag‘lubiyat qayd etildi. Qolaversa, Osiyo Chempionlar ligasi 2 da uning boshchiligida qayd etilgan natijalar ham e’tiborga molik. Boisi, "Andijon" 4 ta o‘yinda o‘z darvozasi daxlsizligini saqlay oldi, mag‘lubiyatsiz seriya qayd etdi.

Jamoamizni boshqarish vaqtinchalik Akmal Shorahmedov zimmasiga yuklatildi", - deyiladi klub xabarida.