"Arsenal" himoyachisi Rikardo Kalafyori jamoasining "Tottenxem" ustidan qozonilgan yirik g‘alabasi (4:1) haqida fikr bildirdi.
Italiyalik futbolchi yakshanba kungi derbida 92 daqiqa harakat qilib, "kanonirlar"ning ishonchli g‘alabasiga hissa qo‘shdi.
"O‘yin davomida qanday hissiyotlarni boshdan kechirganimni tasvirlay olmayman. Bu shunchaki aql bovar qilmaydigan holat. Qanday muhit, qanday jamoa, qanday o‘yin! Ichimizda o‘sha olov bilan davom etamiz," - deb yozdi Kalafyori ijtimoiy tarmoqda.
Uchrashuv qahramoni "shporlar" darvozasiga xet-trik qayd etgan Eberechi Eze bo‘ldi. Shuningdek, Leandro Trossard o‘z hisobiga gol yozdirib qo‘ydi. Mehmonlarning yagona goliga Risharlison mualliflik qildi.
"Arsenal" Premyer-liga 12-turidan keyin 29 ochko bilan peshqadamlik qilmoqda va "Chelsi"ni (23) ortda qoldirmoqda.
