La Liganing o‘tgan turida "Real" "Elche" bilan 2:2 hisobida durang o‘ynagan edi. Kuni kecha "Barselona" prezidenti Joan Laporta hakamlar har doim "Real"ga yordam berganini aytdi. Laporta misol tariqasida "qaymoqranglilar"ning "Elche"ga qarshi o‘yindagi gollarini keltirdi. "Barsa" bossining aytishicha, agar hakamlik xatolari bo‘lmaganida, "ko‘k-anorranglilar" hozirda chempionatda peshqadamlik qilayotgan bo‘lardi.

Shanba kungi matbuot anjumanida "Real" ustozi Xabi Alonsodan o‘sha gollar haqidagi gap-so‘zlarga izoh berishni so‘rashdi.

"Ularning muxlislariga yo‘naltiriladigan populistik xabarlarni yaxshi bilamiz. Biz esa faqat o‘z ishimizga e’tibor qaratamiz. Asosiysi — maydonda halol tarzda g‘alaba qozonish. Har bir o‘yin - sinov," - dedi Alonso matbuot anjumanida.

"Real" La Ligada 2-o‘rindagi "Barselona"dan 1 ochko oldinda bormoqda.