“Bavariya” o‘zining ichki sun’iy intellekt platformasidan foydalanishni boshladi. Bu haqda Welt nashri xabar berdi.

Ma’lum qilinishicha, klub Bundesligadagi raqamli transformasiya borasida yetakchilardan biri hisoblanadi. Myunxen klubi xodimlariga ish jarayonida ChatGPT’dan foydalanish taqiqlangan. Klubning o‘z sun’iy intellekt platformasi allaqachon turli bo‘limlarda, xususan, yuridik bo‘lim va muxlislar bilan ishlash xizmatlarida qo‘llanilmoqda.

Hozirda “Bavariya”ning ichki platformasidan klubning qariyb 300 nafar xodimi, ya’ni umumiy shtatning uchdan bir qismi foydalanmoqda. Shuningdek, sun’iy intellekt vositalarini klubning barcha bo‘limlariga joriy etish bo‘yicha ishlar davom etmoqda.

“Biz xodimlarimiz uchun ChatGPT kabi turli sun’iy intellekt platformalaridan foydalanishni taqiqlay boshladik. Buning sababi — ularni o‘zimizning maxsus platformamizdan foydalanishga yo‘naltirish. Bundan tashqari, bu yopiq, xavfsiz xususiy tizim hisoblanadi. Biz katta qarshilik bo‘lishini kutgan edik, ammo bunday bo‘lmadi. Xodimlar qulay va sodda yechimdan mamnun”, dedi “Bavariya”ning raqamli muxlislar bilan ishlash bo‘limi rahbari Tomas Ehemann Myunxendagi ISPO ko‘rgazmasida.

Ma’lumot uchun, “Bavariya” joriy mavsum Germaniya Bundesligasida 34 ochko bilan birinchi, UYEFA Chempionlar Ligasida esa 12 ochko bilan 3-o‘rinni egallab turibdi.