Avgust oyi o‘rtalaridan buyon jarohati sabab maydonga tusha olmayotgan "Napoli" hujumchisi Romelu Lukaku safga qaytishga hozirlik ko‘rmoqda. 32 yoshli belgiyalik hujumchi "Milan"ga qarshi Italiya Superkubogi yarim final o‘yini qaydnomasiga kiritiladi. Bu uning joriy mavsumdagi rasmiy o‘yinlardagi ilk ishtiroki bo‘ladi. Bu haqda Football Italia nashri xabar bermoqda.

Romelu Lukaku avgust oyida Gresiyaning "Olimpiakos" klubiga qarshi o‘rtoqlik o‘yinida jarohat olgandi. Tibbiy tekshiruv natijasida futbolchining son bog‘lamlari uzilgani aniqlandi, bu esa tiklanishning uzoq davom etishiga olib keldi. Ushbu jarohat tufayli belgiyalik futbolchi futbol mavsumi boshidan beri "Napoli"ning barcha rasmiy uchrashuvlarini o‘tkazib yubordi va joriy mavsumda bir daqiqa ham maydonda bo‘lmadi.

Romelu Lukakuning Italiya klubi bilan shartnomasi 2027 yilning iyuniga qadar amal qiladi. Transfermarkt portali ma’lumotlariga ko‘ra, futbolchining bozor narxi 15 mln yevroni tashkil etadi.