Eron kubogining 1/16 final bosqichida Tabrizning «Traktor» hamda Tehronning «Persepolis» jamoalari o‘zaro bahs olib bordi.

Bugun mazkur bosqich doirasida O‘zbekiston milliy terma jamoasi futbolchilari Odiljon Hamrobekov va Oston O‘runov to‘p suradigan jamoalar o‘zaro to‘qnash keldi. Tabriz shahridagi “Yodgori Imom” stadionida bo‘lib o‘tgan uchrashuvning asosiy va qo‘shimcha vaqtlarida 1:1 hisobi qayd etildi, g‘olib penaltilar seriyasida aniqlandi.

Penaltilar seriyasida Odiljon Hamrobekov jamoasi — “Traktor” 8:7 hisobida g‘alaba qozonib, musobaqaning 1/8 final bosqichiga yo‘l oldi. “Persepolis” esa Hazfi Cup turniri bilan xayrlashdi.

Har ikki o‘zbekistonlik futbolchi uchrashuvni asosiy tarkibda boshladi. 58-daqiqada Mehdi Turobiy gol urib, Tabriz klubini hisobda oldinga olib chiqdi. Asosiy vaqtga qo‘shib berilgan 6-daqiqada esa Husayn Kanoniy muvozanatni tikladi. Qo‘shimcha bo‘limlarda ham hisob o‘zgarmadi. Penaltilar seriyasida esa omad tabrizliklarga kulib boqdi.

Uchrashuvni to‘liq o‘tkazgan Odiljon Hamrobekov penaltilar seriyasida o‘z zarbasini aniq amalga oshirdi. “Persepolis” bosh murabbiyi esa 81-daqiqada Oston O‘runovni zaxiraga oldi.

“Traktor” Eron kubogining 1/8 final bosqichida “Shams Azar Qazvin” jamoasiga qarshi bahs olib boradi. Mazkur uchrashuv 12 yanvar kuni “Sardor Azadegan” stadionida o‘tkaziladi.

Ma’lumot uchun, Eron Pro ligasining joriy mavsumida “Persepolis” 14 ta uchrashuvdan so‘ng 25 ochko jamg‘arib, turnir jadvalida 2-o‘rinni egallab turibdi. 13 o‘yinda 21 ochko to‘plagan “Traktor” esa 5-pog‘onada bormoqda.