Samarqandning “Dinamo” klubi sobiq futbolchisi, 2019—2020-yillar “Buxoro” klubida bosh murabbiy sifatida faoliyat yuritgan tojikistonlik mutaxassis Muhsin Muhammadiyev 1 yanvar kuni og‘ir xastalikdan keyin vafot etdi.

“Ha, bu bugun kechqurun sodir bo‘ldi”, deya marhumning rafiqasi Mohira Muhammadiyevaning so‘zlarini keltiradi TASS.

Ma’lumotlarga ko‘ra, Muhammadiyev 2025 yil fevral oyida “Vaxsh” klubining Turkiyadagi o‘quv-mashg‘ulot yig‘ini chog‘ida insult o‘tkazgan. Shundan so‘ng uni Moskvaga olib ketishadi va u yerda yana bir necha bor xurujlar kuzatilgan.

2025 yil iyun oyida Muhamadiyev Rossiya FMBA Federal miya va neyrotexnologiyalar markazining reanimasiya bo‘limiga og‘ir ahvolda yotqizilib, sun’iy nafas olish apparatiga ulangan. Iyun oyi oxirida esa u yarim yil davomida bir necha marotaba insult o‘tkazgani ma’lum bo‘lgan. 2025 yil sentyabr oyida u shifoxonadan chiqarilgan bo‘lsa-da, sog‘lig‘i bilan bog‘liq muammolar saqlanib qolgan va davolanish jarayoni davom etgan. Muhsin Muhamadiyev 2026 yil 1 yanvar kuni Moskvada, davolanayotgan klinikalardan birida vafot etdi.

Ma’lumot uchun, 1966 yil Dushanbeda tug‘ilgan mutaxassis 2013–2015-yillarda Tojikiston milliy terma jamoasi bosh murabbiyi, 2016–2018-yillarda “Istiqlol”, 2019–2020-yillarda “Buxoro” klublarini boshqargan. Keyinchalik Qozog‘istonning “Ordabasi” klubida murabbiy sifatida faoliyat yuritgan, “Istiqlol” klubining birinchi vise-prezidenti, shuningdek, Tojikistonning “Vaxsh” klubida direktor lavozimida ishlagan.