"Liverpul"ning sobiq futbolchisi Jeymi Karrager Ruben Amorimning "Manchester Yunayted"dagi faoliyatini qattiq tanqid qilib, uni Aleks Fergyuson ketganidan beri klubning eng yomon murabbiyi deb atadi.

Karragerning ta’kidlashicha, avvalgi murabbiylarga qaratilgan barcha tanqidlarga qaramay, jamoaning Amorim qo‘l ostidagi natijalari eng yomoni edi. Uning so‘zlariga ko‘ra, "Yunayted"ning o‘yin darajasi klubning mavqei va sarflangan resurslarga mos kelmadi.

"Amorim, ehtimol, bu ro‘yxatning eng pastki qismida. Bundan ham yomonroq bo‘lishi mumkin emas. Jamoa o‘tgan mavsumda 15-o‘rinni egalladi - bu "Manchester Yunayted" darajasidagi klubda sodir bo‘lmasligi kerak", dedi Karrager.

Mutaxassis shuningdek, eng qiyin davrlarda ham jamoa avvalgi murabbiylar qo‘l ostida yaxshiroq o‘ynaganini, bu mavsumda esa oltinchi o‘rinda bo‘lib turganiga qaramay, "Manchester Yunayted" chindan ham yomon ko‘rinayotganini ta’kidladi.