Nufuzli The Athletic nashri "Liverpul"ning 2026 yilga mo‘ljallangan transfer rejalarini ma’lum qildi.
Manbaga ko‘ra, Mersisayd klubi yanvar oyida Konor Bredlining og‘ir jarohati fonida yangi futbolchilar bilan shartnoma imzolamaydi. Ammo "qizillar" kelasi yozdayoq asosiy e’tiborni yangi markaziy himoyachi topishga qaratmoqchi, chunki ular Ibrohima Konate bilan shartnomani uzaytirish borasida kelisha olmayapti.
Qayd etilishicha, Virjil van Deyk va Jo Gomesning klub bilan amaldagi shartnomasi 2027 yilning iyun oyi oxirida yakuniga yetadi, shu bois "Liverpul" rahbariyati munosib o‘rinbosar topish ustida ish olib bormoqda.
Muhammad Saloh kamida 2025/26-yilgi mavsum oxirigacha klubda qoladi, Federiko Kyeza esa yaqin kelajakda jamoani tark etishi mumkin, chunki unga Turinning "Yuventus" klubi qiziqish bildirmoqda.
Eslatib o‘tamiz, "Liverpul" 21-tur yakunlariga ko‘ra 35 ochko bilan APL turnir jadvalida to‘rtinchi o‘rinda bormoqda.
