«Manchester Siti» Angliya Liga kubogi yarim finalining birinchi o‘yinida safarda «Nyukasl»ni 2:0 hisobida mag‘lub etdi.
Uchrashuvda gol urgan futbolchilardan biri qanot hujumchisi Antuan Semenyo bo‘ldi. «Shaharliklar» uni «Bornmut»dan bor-yo‘g‘i bir hafta oldin sotib olgan edi. Yangi futbolchi ketma-ket ikkinchi o‘yinida ham raqib darvozasini ishg‘ol qildi. U bundan avval klubdagi debyut uchrashuvida — Angliya Kubogida «Ekseter»ga qarshi bahsda (10:1) ham gol urishga muvaffaq bo‘lgan edi.
Shu tariqa, Semenyo 2009 yildan beri «Manchester Siti» safida jamoa uchun ilk ikki o‘yinidayoq gol urgan birinchi futbolchiga aylandi. Bundan oldin bunday natija Emmanuel Adebayor tomonidan qayd etilgan edi.













