Liga musobaqalarga qur’a tashlashda uzoq yillar davomida Berger tizimiga asoslangan klassik uslubdan foydalanib keldi. Biroq bugungi kunda jahonning yetakchi ligalari taqvimdagi qiyinchiliklar, logistika muammolari va jamoalarning xalqaro musobaqalarini inobatga olgan holda, sun’iy idrokka asoslangan yangi metodlardan foydalanishga o‘tgan.

O‘zbekiston milliy jamoasi Jahon kubogida ishtirok etishidan kelib chiqib, 2026 yil futbolimiz uchun tarixiy ahamiyat kasb etadi. 2027 yilning dastlabki kunlaridanoq esa Saudiya Arabistonida Osiyo kubogi start oladi. Yarim yil ichidagi ikki yirik musobaqa Superliga taqvimini shakllantirishda qator qiyinchiliklarni keltirib chiqaradi.

Liga o‘tgan mavsum yangi qur’a mexanizmlari bo‘yicha xalqaro tajribani tahlil qildi va GotSport kompaniyasi bilan shartnoma imzolashga qaror qildi. Mazkur kompaniya xizmatlaridan g‘arbning futbol rivojlangan mamlakatlari qatoridan Janubiy Koreya K ligasi, Avstraliya A ligasi kabilar ham foydalanmoqda.

Liga 2026 yilning birinchi yarmini boshqa maydonlarda boshlashni rejalashtirgan klublar haqida e’lon qilgandi. Shuningdek, yangi taqvim rejani ishlab chiqishda xalqaro maydonda O‘zbekiston nomidan ishtirok etuvchi klublar imkoniyatlari ham inobatga olinishi rejalashtirilgan. Bundan tashqari, derbilar, o‘tgan mavsumni kuchli to‘rtlikda yakunlagan klublarga qarshi uchrashuvlarning ketma-ket turlarga to‘g‘ri kelib qolmasligi masalasiga ustuvorlik beriladi.

Ayni paytda Liga GotSport mutaxassislari bilan hamkorlikda yangi mavsum taqvim rejasining bir necha o‘nlab versiyalarini muhokama qilmoqda. Tez orada ishchi guruh saralab olgan taqvim loyihalari klublarga taqdim etiladi va ular afzal bilgan variantlardan qay biri asosida musobaqa o‘tkazish masalasi kelishiladi.

Yangi hamkorlik Superliganing yanada raqobatbardosh va tomoshabop musobaqa bo‘lishiga hissa qo‘shishiga ishonamiz.