El Chiringuito jurnalisti Xose Luis Sanches La Liganing 21-turi doirasida “Real Madrid”ning “Vilyarreal” ustidan 2:0 hisobida qozonilgan g‘alabasidan so‘ng, Madrid klubi rahbariyati tomonidan jamoa oldiga joriy mavsum yakunida bosh murabbiy Alvaro Arbeloa boshchiligida ikki musobaqada muvaffaqiyatga erishish talabi qo‘yilganini ma’lum qildi.

“‘Real’ rahbariyatida hozirgi sharoitda mavsumning o‘zidayoq Ispaniya chempionati va Chempionlar Ligasida g‘alaba qozonish talabi mavjud”, — dedi Xose Luis Sanches El Chiringuito jonli efirida.

Ma’lumot uchun, “Real Madrid” La Liganing 21-turi doirasida Kilian Mbappening dubli evaziga “Vilyarreal”ni mag‘lub etdi va 51 ochko jamg‘arib, turnir jadvalida peshqadamlik qilmoqda. “Qirollik klubi” ayni vaqtda “Barselona”dan ikki ochkoga oldinda bormoqda. Biroq kataloniyaliklar 21-tur uchrashuvini 25 yanvar kuni “Real Ovedo”ga qarshi o‘tkazadi.

UYEFA Chempionlar Ligasi umumiy bosqichi yakunlariga ko‘ra, “qaymoqranglilar” yettinchi turdan so‘ng 15 ochko bilan uchinchi o‘rinni egallab turibdi.

Avvalroq “Real Madrid” Ispaniya kubogidagi ishtirokini yakunlagan edi. Madridliklar 1/8 final bosqichida Segundada ishtirok etuvchi “Albasete”ga 2:3 hisobida mag‘lub bo‘ldi. Shuningdek, klub Ispaniya Superkubogi finalida “Barselona”ga ham 2:3 hisobida yutqazgan.