"Lasio" markaziy himoyachisi Mario Xila klubini o‘zgartirishi mumkin. AS nashrining xabar berishicha, Italiyaning "Milan" klubi 25 yoshli futbolchi bilan shartnoma imzolashga qiziqish bildirmoqda. Manbaga ko‘ra, "rossonerilar" ispaniyalik futbolchi uchun 20 million yevro to‘lashga tayyor.
"Milan" Xilaning transferini yozgi transfer oynasida, ya’ni uning hozirgi klubi bilan shartnomasi tugashiga bir yil qolganda amalga oshirishga tayyorligi haqida xabarlar tarqalgan.
Mario Xila "Lasio"ga 2022-yil yozida 6 million yevro evaziga "Real Madrid" yoshlar jamoasidan qo‘shilgan edi. OAV xabarlariga ko‘ra, "Los Blankos" himoyachining keyingi transfer narxining 50 foizini olish huquqiga ega. Shuning uchun, agar "Milan" va "Lasio" o‘rtasidagi kelishuv yakunlansa, "Real Madrid" 10 million yevro ishlab topadi.













