Ispaniyaning “Barselona” klubi yozgi transfer oynasida Robert Levandovski o‘rnini to‘ldirishni rejalashtirmoqda. Fichajes nashri xabariga ko‘ra, 26 yoshli serbiyalik hujumchi Dushan Vlahovich asosiy nomzod sifatida qayd etilgan. Uning “Yuventus” bilan amaldagi shartnomasi muddati 2026 yil iyun oyida tugaydi, shuning uchun uni bepul olish imkoniyati Kataloniya klubi uchun muhim omil hisoblanadi.

Levandovski so‘nggi oylar davomida jismoniy muammolarga duch kelgan bo‘lsa-da, hali ham “Barselona” hujumining markaziy figurasi hisoblanadi. Biroq 37 yoshli polshalik futbolchining kelajagi noaniq bo‘lib, klub uning o‘rnini to‘ldira oladigan futbolchi sifatida aynan Vlahovichni tanlagan.

Qayd etilishicha, Dushan Vlahovich jarima maydonidagi yakunlovchi, standart vaziyatlarni ijro etadigan va tezkor hujumlarda aniq harakat qiladigan futbolchi sifatida “Barselona”ning old chizig‘ini mustahkamlash uchun ideal nomzod hisoblanadi. Uning 26 yoshda ekani esa klub uchun uzoq muddat barqarorlik kafolatini beradi.

Shuningdek, Italiyaning “Milan” klubi serbiyalik hujumchi bilan muzokaralarni davom ettirmoqda va “Barselona”ning asosiy raqobatchisi bo‘lishi mumkin. Shu bilan birga, Italiya A Seriyasi va Angliya Premyer Ligasi klublari ham Vlahovichga qiziqish bildirgan.

“Barselona” sport direktori va Hansi Flik uni o‘z tizimiga mukammal mos tushadi, deb hisoblaydi.

“Vlahovichning kelishi Levandovski “Kamp Nou”dan ketishga qaror qilsa, klubning asosiy hujumchisi sifatida bir necha yil davomida jamoaga xizmat qilishi mumkin”, deyiladi xabarda.