"Barselona" yarim himoyachisi Gavi jarohatdan tiklanishning yakuniy bosqichida muhim qadamlarni tashlashda davom etmoqda.

O‘tgan yilning sentyabr oyida 21 yoshli yarim himoyachi o‘ng tizzasidagi menisk jarohatini davolash uchun artroskopik jarrohlik amaliyotini o‘tagan edi.

Tiklanish davri taxminan to‘rt-besh oy etib belgilangandi. Gavining o‘zi ijtimoiy tarmoqlardagi sahifalari orqali sog‘lig‘i borasidagi yangiliklarni bo‘lishib kelmoqda.

Bugun Gavi yana bir qadam oldinga siljidi — u to‘p bilan ishlashni boshladi va bu haqdagi videoni ijtimoiy tarmoqqa joylashtirdi. Videoda uning murabbiylar shtabi a’zosi nazorati ostida bir nechta to‘plar bilan mashq bajarayotganini ko‘rish mumkin.

"Shuncha vaqtdan keyin to‘p bilan mashq qilish — ajoyib tuyg‘u", — deb yozdi klub akademiyasi tarbiyalanuvchisi.

Navbatdagi bosqich to‘p bilan ishlashdagi ijobiy hissiyotlar to‘liq tiklangach, guruh mashg‘ulotlariga qo‘shilish bo‘ladi. Shundan so‘ng u tibbiy ruxsatnoma oladi va Xansi Flik ixtiyoriga qaytadi.

23 fevral kuni tiklanish uchun belgilangan besh oylik muddat yakuniga yetadi, biroq na klub, na murabbiylar shtabi uning umumiy guruhga qaytishi bo‘yicha aniq muddatlarni belgilamayapti.

Jarohat olgunga qadar Gavi joriy mavsumda faqat ikkita o‘yinda maydonga tushgandi. Har ikki holatda ham u zaxiradan o‘yinga qo‘shilgan va bitta golli uzatmani amalga oshirishga ulgurgan edi.