«Barselona» sport direktori Deku jamoaning «Real» bilan chempionlik uchun kurashi haqida o‘z fikrlarini bildirdi. Ayni damda kataloniyaliklar turnir jadvalida madridliklarni bir ochkoga ortda qoldirib, peshqadamlik qilishmoqda.

«Mening fikrim murabbiyimizning fikri bilan bir xil. Chempionat — bu uzoq masofa va unda kim kamroq xato qilsa, kim barqarorroq bo‘lsa va bu tempga chiday olsa, o‘sha yuqori o‘rinni egallaydi. O‘ylaymanki, biz hamma narsani to‘g‘ri qilyapmiz, lekin oldinda hali ko‘plab va o‘ta qiyin o‘yinlar kutib turibdi.

Har bir o‘yinga alohida yondashish kerak. Eng muhimi — jamoa yaxshi holatda, biroq oldinda hali uzoq yo‘l bor. «Real» sezilarli darajada kuchaydi, ularda ajoyib futbolchilar bor. «Atletiko» biroz ortda qolgan bo‘lsa-da, hali kurashga qaytishi mumkin, ayniqsa, ular bilan bo‘lajak o‘zaro o‘yinimizni hisobga olsak», — deya Dekuning so‘zlarini keltirmoqda Ispaniyaning «Sport» nashri.

Eslatib o‘tamiz, bugun — payshanba, 12 fevral kuni «Barselona» Ispaniya Kubogi yarim finali doirasida «Atletiko»ga qarshi ilk uchrashuvni o‘tkazadi.