«Brayton» bosh murabbiyi Fabian Xyurseler, agar jamoa natijalari yaxshi tomonga o‘zgarmasa, yaqin haftalarda iste’foga chiqarilishi mumkin.

«The Telegraph» nashri jurnalisti Mett Louning yozishicha, APLdagi g‘alabasiz beshta o‘yindan so‘ng germaniyalik mutaxassisning kelajagi katta so‘roq ostida qolgan. Keyingi bahslar yosh murabbiyning «chaykalar» lageridagi faoliyatida hal qiluvchi ahamiyatga ega bo‘ladi.

Eslatib o‘tamiz, shu haftada APLning ikkita klubida murabbiylar iste’fosi yuz berdi — bular Tomas Frank («Tottenxem») va Shon Daych («Nottingem Forest»).

Xyurseler o‘tgan mavsumdan beri «Brayton» bosh murabbiyi bo‘lib ishlab kelmoqda. Uning qo‘l ostida jamoa o‘tgan mavsumni sakkizinchi o‘rinda yakunlagan edi. Joriy mavsumda esa «Brayton» hozircha bor-yo‘g‘i 14-pog‘onani egallab turibdi.