Belgiyaning «Bryugge» klubi bosh murabbiyi Ivan Leko Madridning «Atletiko» jamoasiga qarshi bo‘lib o‘tadigan UEFA Chempionlar ligasi javob o‘tish uchrashuvi oldidan matbuot anjumanida ishtirok etdi. Mazkur bahs 24 fevral kuni bo‘lib o‘tadi, ilk o‘yinda esa 3:3 hisobidagi durang qayd etilgan edi.

«Bunday o‘tish o‘yinlarida ishtirok etish — katta imtiyoz. Boshqa tomondan, inson doim ko‘prog‘ini xohlaydi. Keling, bu bizning chegaramiz emasligini ko‘rsatishga harakat qilamiz. Biz bu yerga natija uchun kelganmiz. Hatto eng buyuk jamoalarga qarshi o‘ynayotgan bo‘lsak ham. Kimga qarshi maydonga tushayotganimizni yaxshi bilamiz, ammo maqsadimiz o‘zgarmaydi», — deya Lekoning so‘zlarini keltiradi UEFA rasmiy sayti.

Uchrashuv Toshkent vaqti bilan soat 22:45 da boshlanadi. O‘yinni fransiyalik Kleman Tyurpen boshchiligidagi hakamlar brigadasi boshqarib boradi.