"Chelsi" xo‘jayinlari — London klubini nazorat qiluvchi BlueCo kompaniyalar guruhi, Filipe Luisning "Flamengo"dan kutilmaganda bo‘shatilishiga bilvosita aloqador bo‘lib chiqdi. Vaholanki, ushbu mutaxassis uch oydan kamroq vaqt oldin Braziliya chempionati va Libertadores Kubogida g‘olib chiqqan edi.
OUL Esporte nashrining braziliyalik jurnalisti Rodrigo Mattos bergan ma’lumotlarga ko‘ra, "Flamengo" rahbariyati va murabbiy o‘rtasidagi keskinlik o‘tgan yilning dekabr oyi oxirida, shartnomani uzaytirish bo‘yicha muzokaralar vaqtida yuzaga kelgan. O‘shanda "Flamengo" prezidenti Luis Eduardo Baptista Filipe Luisning "Chelsi" xo‘jayinlari bilan muzokara olib borayotganidan xabar topgan.
Rasman "Flamengo" mutaxassis bilan shartnomani 2025 yil 29 dekabrda uzaytirgan edi, "Chelsi" esa oradan atigi uch kun o‘tib — 2026 yil 1 yanvarda Enso Mareska iste’foga chiqarilganini e’lon qildi. Bu shundan dalolat beradiki, Braziliyada Filipe Luis bilan shartnomani uzaytirish bo‘yicha muzokaralar davom etayotgan bir vaqtda, BlueCo bilan ham aloqalar o‘rnatilgan.
