Madridning «Atletiko» klubi bosh murabbiyi Diyego Simeone Ispaniya Kubogi yarim finalining javob uchrashuvidan so‘ng «Barselona»ning ikki futbolchisini maqtadi.
Kataloniyaliklar 3:0 hisobida g‘alaba qozonishdi, biroq fevral oyidagi birinchi bahsda 4:0 hisobida zafar quchgan «matraschilar» finalga yo‘l olishdi. «Kamp Nou»dagi bellashuv yakunida jurnalistlar bilan suhbatlashgan Simeone Rafinya va Pedrining o‘yiniga qoyil qolganini bildirdi.
«Rafinyaga haqqoniy baho berish kerak — u fantastik o‘yinchi. U va Pedri — shunchaki aql bovar qilmas futbolchilar», — deya argentinalik mutaxassisning so‘zlarini keltirmoqda jurnalist Fabrisio Romano.
Bugun «Real Sosyedad» va Bilbaoning «Atletik» jamoalari Ispaniya Kubogi finalining ikkinchi yo‘llanmasi uchun bahs olib borishadi.
