FIFA 2026-yilgi Jahon chempionati o‘yinlarining har bir taymi o‘rtasida o‘yinchilarning suv ichib olishi (“cooling break”) uchun beriladigan tanaffuslar vaqtida teleradiokompaniyalarga reklamalarni namoyish etishga ruxsat beradi. Bu haqda The Athletic nashri xabar berdi.

Qayd etilishicha, tashkilot JCH-2026 o‘yinlari davomida translyasiyani reklama bilan to‘xtatish imkoniyatini ko‘rib chiqmoqda. Ushbu o‘zgarish allaqachon translyasiya huquqiga ega teleradiokompaniya rahbarlari bilan muhokama qilingan.

2025 yil dekabr oyida e’lon qilinganidek, ob-havo sharoitidan qat’i nazar, har bir taymning o‘rtasida uch daqiqalik majburiy tanaffus bo‘ladi. Translyasiya vaqtida reklama qo‘yish amaliyoti futbol uchun yangilik bo‘lsa-da, bu tajriba basketbol va Amerika futbolida (NFL) keng qo‘llaniladi. Bu o‘zgarish FIFA va teleradiokompaniyalar uchun qo‘shimcha daromad manbai bo‘lishi kutilmoqda.

Futbol olamining boshqaruv organi teleradiokompaniyalar bilan ushbu o‘zgarishni muhokama qilgan va quyidagi qoidalarni ishlab chiqqan:

Vaqt chegarasi: Reklama bloki hakam tanaffus e’lon qilganidan keyin 20 soniya o‘tgach boshlanishi va o‘yin qayta tiklanishidan kamida 30 soniya oldin yakunlanishi kerak. Demak, teleradiokompaniyalarda sof reklama uchun 2 daqiqa 10 soniya vaqt bo‘ladi.

Tanlov huquqi: Kanallar reklamaga o‘tishga majbur emas. Ular studiyadagi tahlilni ko‘rsatishi, o‘yin maydonidagi tasvirni qoldirishi yoki “ekran ichida ekran” (split-screen) formatida reklama berishi mumkin.

Homiylik masalasi: Agar teleradiokompaniya efirni to‘liq uzmasdan, ekranning bir qismida reklama ko‘rsatsa, u yerda faqat FIFA rasmiy homiylari reklama qilinishi shart.

To‘liq reklama bloki: Agar kanal efirni butunlay reklamaga yo‘naltirsa, u holda reklama vaqtini istalgan kompaniyaga sotishi mumkin.