«Lion» 29 yoshli darvozabon Remi Deskamp bilan amaldagi shartnomani uzaytirdi. Fransiyalik posbon bilan imzolangan yangi kelishuv 2029 yilning yoziga qadar mo‘ljallangan.

Deskamp «Lion» tarkibiga 2024 yilning yozida kelib qo‘shilgan edi. «Lill» klubi tarbiyalanuvchisi hisoblangan futbolchi faoliyati davomida «Tur», «Sharlerua» va «Nant» kabi jamoalar sharafini himoya qilgan.

Joriy mavsumga to‘xtaladigan bo‘lsak, darvozabon «Lion» safida barcha musobaqalarda jami 12 ta o‘yinda maydonga tushdi. Ushbu uchrashuvlarda u o‘z darvozasidan atigi 9 ta to‘p o‘tkazib yubordi, xolos.

Ayni damda «Lion» UEFA Yevropa Ligasida muvaffaqiyatli ishtirok etmoqda (jamoa liga bosqichini 1-o‘rinda yakunlab, to‘g‘ridan-to‘g‘ri 1/8 finalga yo‘l oldi). Shuningdek, klub Fransiya 1-ligasida ham yuqori o‘rinlar uchun kurashyapti. Hozirda «to‘quvchilar» milliy chempionatda 46 ochko bilan turnir jadvalining to‘rtinchi pog‘onasini egallab turishibdi.