«Nyukasl» jamoasi Chempionlar ligasi 1/8 finali doirasidagi o‘yinda «Barselona» darvozasiga raqibiga nisbatan deyarli ikki baravar ko‘p zarba yo‘lladi.

Jamoalarning Angliyadagi ilk uchrashuvi 1:1 hisobidagi durang bilan yakunlandi. Kataloniyaliklar vingeri Lamin Yamal 96-daqiqada penaltidan hisobni tenglashtirdi.

Yamalning nuqtadan yo‘llagan zarbasiga qadar «Barselona» futbolchilari butun o‘yin davomida darvoza sohasiga atigi bir marta aniq zarba berishgan edi. Umumiy hisobda kataloniyaliklar 9 ta zarba ijro etishdi.

«Nyukasl» futbolchilari esa «Barselona» darvozasi tomon 16 bor zarba berib, ularning to‘rttasini aniq yo‘naltirishdi.

«Barselona» o‘yin vaqtining 54 foizida to‘pga egalik qilgan bo‘lsa-da, burchak zarbalari borasida raqibdan ortda qoldi (4 ga qarshi 9 ta). Shuningdek, mezbonlar hujumlar soni bo‘yicha ham mehmonlardan ustun kelishdi (36 ga qarshi 29 ta).