“Superliga reglamenti”ning 16-bobida musobaqada ishtirok etuvchi jamoalar bahslarda maqomiga qarab uy yoki mehmon liboslarda maydonga tushishi keltirib o‘tilgan. Unga ko‘ra, jamoalar uy uchrashuvlarida kiyib tushadigan liboslarini mavsum oldidan Ligaga taqdim etishi kerak. Shundan kelib chiqib, Liga mehmon jamoaga mehmondagi bahslarda qaysi liboslarda maydonga tushishini belgilashga, zaxira yoki uchinchi liboslarini talab qilishga haqlidir.
Bugun bo‘lib o‘tadigan Superliga 4-turi doirasidagi OKMK — “So‘g‘diyona” uchrashuvida OKMK jamoasi mavsum avvalida o‘zi taqdim etgan uy libosida — kulrang-oq liboslarda maydonga tushishi kerak edi. Ammo mehmonda o‘ynayotgan “So‘g‘diyona” jamoasining har ikki libosi ham OKMKning uy libosi rangiga yaqin bo‘lgan va uchrashuvda jamoalar kiyib tushadigan liboslar uchrashuv rasmiylarining haqli e’tiroziga sabab bo‘lgan.
Liga mavjud vaziyatdan kelib chiqib, OKMK jamoasiga ushbu uchrashuvda ikkinchi — ko‘k rangli liboslarda maydonga tushishga ruxsat berdi. “So‘g‘diyona” esa mehmon jamoaga belgilangan talablarga rioya qilmagani, har ikki tanlagan liboslari rangi bir-biriga o‘xshagani, uchinchi zaxira liboslarini Ligaga taqdim eta olmagani bois, Musobaqa reglamentining 16.14-bandiga asosan jarimaga tortiladi.
