«Chelsi»ning afsonaviy sardori Jon Terri «Arsenal»ning yosh yulduzi Maks Douman haqida juda iliq fikrlar bildirdi. Kuni kecha Douman 16 yoshu 73 kunligida APLning 21-turidan o‘rin olgan «Everton»ga qarshi o‘yinda (2:0) gol urdi va liga tarixidagi eng yosh gol muallifiga aylandi.

London klublari o‘rtasidagi azaliy raqobatga qaramay, Terri «kanonirlar» safidagi iqtidorni e’tirof etdi.

«Maks Douman — haqiqiy futbolchi! Atigi 16 yosh. Bu shunchaki aql bovar qilmas darajada.

Men uning «Chelsi»ga qarshi o‘yinini taxminan bir yil oldin ko‘rgandim. O‘shandan beri raqiblarini xuddi maydon uzra parvoz qilayotgandek osonlik bilan ortda qoldiradigan boshqa futbolchini uchratmadim. Messidan boshqa hech kim buni u kabi bajara olmaydi. Ha, tushunaman, bu juda jiddiy, o‘ta jiddiy taqqoslash. Ammo bu bola — «Arsenal» va Angliya terma jamoasi kelajagida katta rol o‘ynaydigan haqiqiy noyob iqtidordir», — deya Terrining so‘zlarini keltirmoqda The Touchline nashri.