Xabarlarga ko‘ra, «Chelsi» «Bavariya»ning tajribali markaziy himoyachisini sotib olish orqali o‘z mudofaa chizig‘ini kuchaytirishga qiziqmoqda.

Jurnalist Kristian Falkning so‘zlariga ko‘ra, London klubi vakillari 29 yoshli Kim Min Jega nisbatan aniq qiziqish bildirgan. «Chelsi» janubiy koreyalik himoyachi jamoaning himoya chizig‘iga kuch, barqarorlik va yuqori darajadagi tajriba qo‘shishiga ishonmoqda.

Biroq, bu poygada «aristokratlar» yolg‘iz emas. Kimning faoliyatini «Tottenxem», «Inter» va «Milan» klublari ham kuzatib bormoqda, bu esa ehtimoliy transfer uchun raqobatni kuchaytiradi.

Himoyachining «Bavariya» bilan shartnomasi 2028 yil iyun oyi oxirigacha amal qiladi. Bu esa Bundesliga chempionlari muzokaralarda kuchli pozisiyaga ega ekanligini anglatadi.

Joriy mavsumda Kim barcha musobaqalarda 27 ta o‘yinda maydonga tushib, bitta gol va bitta golli uzatmani amalga oshirdi. Transfermarkt portaliga ko‘ra, uning bozor qiymati hozirda 25 million yevroga baholanmoqda.