Italiya terma jamoasi Jahon chempionatining so‘nggi yo‘llanmalari uchun mas’uliyatli kurash oldida turibdi. Payshanba oqshomida jamoa Shimoliy Irlandiya termasiga qarshi maydonga tushadi. Italyanlar xotirasida avvalgi o‘tish o‘yinlaridagi (pley-off) muvaffaqiyatsizliklar hali ham yangi va bu safar ham nimadir noto‘g‘ri ketishidan xavotirlar kuchli. Biroq afsonaviy sobiq hujumchi Alessandro Del Pyero futbolchilarni o‘zlariga ishonishga chaqirdi.
«Hamma hech qanday qo‘rquvsiz jamoa atrofida birlashishi kerak. Uchrashuvning muhimligini barcha tushunib turibdi, lekin maydonga qo‘rqmasdan va o‘z imkoniyatlarining 100 foizini berish niyatida chiqish lozim. Biz o‘z uyimizda o‘ynayapmiz, muxlislar futbolchilarimizni qo‘llab-quvvatlaydi», — deya Del Pyeroning so‘zlarini keltiradi pianetamilan.it.
Eslatib o‘tamiz, Italiya terma jamoasi o‘z saralash guruhida ikkinchi o‘rinni egallagani sababli o‘tish o‘yinlarida ishtirok etmoqda.
