«Bavariya»ning 18 yoshli yarim himoyachisi Lenart Karl Germaniya milliy terma jamoasi safidagi ilk o‘yinini Shveysariyaga qarshi o‘rtoqlik bahsida o‘tkazdi. Uchrashuv Bazel shahridagi «Sankt-YAkob Park» stadionida bo‘lib o‘tdi va mehmonlarning 4:3 hisobidagi g‘alabasi bilan yakunlandi.

Yosh futbolchi 63-daqiqada Leroy Sane o‘rniga maydonga tushdi. Shu paytga kelib Germaniya terma jamoasi 3:2 hisobida oldinda edi. Sofascore statistik portali uning o‘yinini yuqori baholab, 7.4 reyting berdi.

Joriy mavsumda Lenart Karl «Bavariya» safida barcha musobaqalarda 33 ta o‘yin o‘tkazib, 8 ta gol urdi va 5 ta golli uzatma amalga oshirdi.