“Bavariya” kuzatuv kengashi a’zosi Uli Xyoness yozgi transfer oynasi vaqtida jamoa vingeri Maykl Olisening sotilishi borasidagi gap-so‘zlarga munosabat bildirdi. Avvalroq, futbolchiga Angliya Premyer Ligasi klublari tomonidan qiziqish borligi haqida xabarlar tarqalgan edi.

“Biz bu o‘yinni muxlislarimiz uchun o‘ynaymiz. Klubimizning 430 ming nafar a’zosi va butun dunyo bo‘ylab millionlab muxlislari bor. Agar hisobimizda yana 200 million yevro ko‘payib, lekin jamoamiz har dam olish kunlari yomonroq o‘yin ko‘rsatadigan bo‘lsa, bundan muxlislarga foyda yo‘q”, deya Xyonessning so‘zlarini keltirmoqda Goal nashri.

Ma’lumotlarga ko‘ra, yaqinlashib kelayotgan transfer oynasida Fransiya terma jamoasi vingerini o‘z safiga qo‘shib olishga “Liverpul” jiddiy qiziqish bildirmoqda. Ingliz klubi Oliseni mavsum yakunida jamoani tark etishini e’lon qilgan misrlik Muhammad Salohga munosib o‘rinbosar sifatida ko‘rmoqda.

Avvalroq, “Real Madrid” klubi prezidenti Florentino Peres “Bavariya” yulduzi Maykl Oliseni qo‘lga kiritish uchun harakatlarni shaxsan o‘z nazoratiga olgani va futbolchi uchun 160 million yevrodan voz kechishga tayyor ekani xabar qilingan edi.

Ma’lumot uchun, Maykl Olise Germaniya klubidagi ikkinchi mavsumini o‘tkazmoqda. Futbolchi shu vaqtga qadar klub safida jami 93 ta uchrashuvda maydonga tushib, o‘z hisobiga 35 ta gol va 50 ta golli uzatmani yozdirib qo‘ygan. Transfermarkt portali uning qiymatini 140 million yevroga baholamoqda.