Madridning «Real» klubi hujumchisi Kilian Mbappe «qirollik klubi»da o‘ziga nisbatan qilinayotgan tanqidlarga munosabati haqida gapirib berdi.

«Real»da hammani tanqid qilishgan: Ronalduni ham, Di Stefanoni ham. Nima uchun men istisno bo‘lishim kerakligini tushunmayman. Ispanlar — juda ehtirosli insonlar. Ular uchun «Real»ga muxlislik qilish xuddi dinga e’tiqod qilishdek gap», — deya Mbappening so‘zlarini TF1 nashriga tayanib El Chiringuito keltirmoqda.

Mbappe 2024 yil yozidan beri Ispaniya grandi safida to‘p surib kelmoqda. Joriy mavsumda hujumchi barcha turnirlarda 35 ta o‘yinda ishtirok etib, o‘z hisobiga 38 ta gol va oltita golli uzatmani yozdirib qo‘ydi. Futbolchining klub bilan amaldagi shartnomasi 2029 yil yozigacha mo‘ljallangan. Transfermarkt portali taqdim etgan ma’lumotlarga ko‘ra, futbolchining bozor qiymati 200 million yevroni tashkil etadi.