Bugundan FIDE tomonidan tashkil etilgan shaxmat bo‘yicha 2026 yilgi Jahon chempionligi uchun yo‘llanma beruvchi talabgorlar musobaqasi boshlandi.

Birinchi turda Javohir Sindarov rossiyalik Andrey Yesipenkoga qarshi oq donalarda o‘ynadi. Dastlabki 20 ta yurishda raqib bexato o‘ynadi va o‘zi uchun qulay vaziyatni qo‘lga kiritdi. Boz ustiga, Sindarov vaqt tanqisligiga duch kela boshladi. Xususan, vaqt qo‘shib beriladigan marra — 40-yurish uchun yana 13 ta yurish qolganida Javohir hisobida bor-yo‘g‘i 7 daqiqadan kamroq vaqt qolgan edi. Bu paytda Yesipenkoda 30 daqiqa vaqt bor edi. Shunga qaramay, rossiyalik sportchi xatoga yo‘l qo‘ya boshladi va boz ustiga u 2 ta yurish uchun naq 24 daqiqa sarflab yubordi.

32-yurishda Yesipenko piyodani urib olishda xatoga yo‘l qo‘ydi. Javohir qisqa vaqtlarda juda aniq yurishlarni amalga oshirdi va 40-yurishni qilganida uning hisobida atigi 5 soniya qolgan edi. Hamyurtimiz vaqt qo‘shilganidan 2 daqiqa o‘yladi va Ruh YE6 yurishini amalga oshirdi. Raqib shundan so‘ng taslim bo‘ldi.

1-turda quyidagi natijalar qayd etildi:

Javohir Sindarov - Andrey Yesipenko - 1:0
Mattias Blyubaum - Vey Yi - 0,5:0,5
Fabiano Karuana - Xikaru Nakamura
Rameshbabu Pragnanandha - Anish Giri

Javohir Sindarov ertaga Mattias Blyubaumga qarshi oq donalarda o‘ynaydi.