«Tottenxem»ning sobiq bosh murabbiyi Maurisio Pochettino jamoa Angliya Premyer-ligasida o‘z o‘rnini saqlab qolishiga ishonch bildirdi.

«Yangi murabbiy bilanmi yoki usizmi, ular Premyer-ligada qolishiga aminman. Bu avvalo futbolchilar tufayli, chunki ularda ajoyib ijrochilar bor. Qolaversa, bu klubning muxlislari g‘alaba uchun kerakli energiyani yaratishda bor imkoniyatlarini ishga soladilar. Albatta, bu oson bo‘lmaydi... Lekin agar mendan ushbu klub haqida so‘rasangiz, u men uchun juda qadrli va men ularning elitada qolishiga shubha qilmayman», — deya Pochettinoning so‘zlaridan iqtibos keltirmoqda The Guardian.

Eslatib o‘tamiz, yaqinda «Tottenxem» Tomas Frank iste’fosidan so‘ng jamoani bor-yo‘g‘i 43 kun boshqargan Igor Tudor bilan xayrlashgan edi. Ayni damda «shporlar» Angliya chempionati turnir jadvalida 30 ochko bilan 17-o‘rinni egallab turibdi. Xavfli hududdan (relegasiya zonasi) ularni atigi bir ochko ajratib turibdi.