Germaniya terma jamoasi bosh murabbiyi Yulian Nagelsmann "Bavariya" yarim himoyachisi Jamal Musiala Jahon chempionati boshlanishiga qadar a’lo darajadagi sport formasida bo‘lishiga qanchalik ishonishi haqidagi savolga javob berdi.
"Men katta umid bog‘layapman. Lekin unga bosim o‘tkazishni istamayman. Uning o‘zi o‘ziga katta bosim o‘tkazadi, bu normal holat. Agar u tiklanib, Jahon chempionatida o‘ynay olsa, barchamiz juda xursand bo‘lardik. U shuni biladiki, agar yaxshi formada bo‘lsa, dunyodagi juda kam sonli murabbiylargina usiz ish tuta olishi mumkin", — dedi Nagelsmann matbuot anjumanida.
Eslatib o‘tamiz, 2025 yilning iyul oyida Musiala Klublar o‘rtasidagi jahon chempionati doirasidagi "PSJ"ga qarshi o‘yinda kichik boldir suyagi sinishi va paylar shikastlanishi jarohatini olgan edi. Jamal operasiyani boshdan kechirdi va maydonga faqat shu yilning boshida qaytdi.
