Turkiyaning «Beshiktash» klubi Myunxenning «Bavariya» jamoasi safida to‘p surayotgan 32 yoshli portugaliyalik himoyachi Rafael Gerreyruni o‘z safiga qo‘shib olishi mumkin. Jurnalist va insayder Ekrem Konurning X ijtimoiy tarmog‘ida bergan ma’lumotiga ko‘ra, ayni damda «Beshiktash» ushbu futbolchi uchun asosiy da’vogar bo‘lib turibdi.

Turkiya klubi bosh murabbiyi Sergen Yalchin tarkibni tajribali va yuqori saviyali futbolchilar bilan kuchaytirishga ehtiyoj sezmoqda. Gerreyru yozgi transfer oynasida jamoaga kelishi mumkin bo‘lgan asosiy nomzod sifatida ko‘rilmoqda.

Himoyachining «Bavariya» bilan shartnomasi shu yilning iyun oyida yakuniga etadi. Bu esa «Beshiktash»ga uni erkin agent sifatida tekinga qo‘lga kiritish imkoniyatini beradi. Joriy mavsumda Gerreyru myunxenliklar safida 24 ta o‘yinda maydonga tushib, 4 ta gol va 3 ta golli uzatmani amalga oshirdi. Transfermarkt portali uning bozor qiymatini 6 million yevroga baholamoqda.