Туркиянинг «Бешикташ» клуби Мюнхеннинг «Бавария» жамоаси сафида тўп сураётган 32 ёшли португалиялик ҳимоячи Рафаэл Геррейруни ўз сафига қўшиб олиши мумкин. Журналист ва инсайдер Экрем Конурнинг X ижтимоий тармоғида берган маълумотига кўра, айни дамда «Бешикташ» ушбу футболчи учун асосий даъвогар бўлиб турибди.

Туркия клуби бош мураббийи Серген Ялчин таркибни тажрибали ва юқори савияли футболчилар билан кучайтиришга эҳтиёж сезмоқда. Геррейру ёзги трансфер ойнасида жамоага келиши мумкин бўлган асосий номзод сифатида кўрилмоқда.

Ҳимоячининг «Бавария» билан шартномаси шу йилнинг июнь ойида якунига этади. Бу эса «Бешикташ»га уни эркин агент сифатида текинга қўлга киритиш имкониятини беради. Жорий мавсумда Геррейру мюнхенликлар сафида 24 та ўйинда майдонга тушиб, 4 та гол ва 3 та голли узатмани амалга оширди. Transfermarkt портали унинг бозор қийматини 6 миллион еврога баҳоламоқда.