«Bavariya» hujumchisi Xarri Keyn Chempionlar Ligasi 1/4 finalining dastlabki uchrashuvida safarda «Real» ustidan qozonilgan g‘alabadan (2:1) mamnun.

«Atrofdagi barcha shov-shuvlar, Madridga kelib natijaga erishishga bo‘lgan urinish – bu doim qiyin.

Bizda yaxshi vaziyatlar bo‘ldi, ammo raqibni ham tan olish kerak – ularda ham imkoniyatlar yetarli edi. Javob o‘yini oldidan bu g‘alabadan juda mamnun bo‘lsak arziydi.

Biz birgalikda chindan ham ajoyib lahzalarni boshdan kechirdik. Hozir mavsumning hal qiluvchi pallasi. Qancha ko‘p birga o‘ynasak va mashg‘ulot o‘tkazsak, o‘zaro tushunish va bog‘liqlik shunchalik kuchayib boradi. Biz doimo xavf sola olishimizni his qilamiz va gol urishimizga ishonamiz.

Hozir yaxshi holatdamiz, lekin diqqatni jamlashimiz kerak. Endi tiklanib olishimiz lozim va keyingi haftada ushbu muvaffaqiyatni takrorlashga harakat qilamiz», – dedi ingliz futbolchisi «TNT Sports» efirida.