«Bavariya»ning 40 yoshli darvozaboni Manuel Noyer klub bilan shartnomani uzaytirish ehtimoli haqida o‘z fikrlarini bildirdi.
Darvozabon jamoadagi holatidan mamnun ekanini ta’kidlab, Germaniya grandi safida faoliyatini davom ettirish ehtimolini inkor etmadi.
— Menga bu klubda o‘ynash va ushbu murabbiylar shtabi bilan ishlash yoqadi. Men uchun jamoaning qanday natija ko‘rsatayotgani juda muhim. Hammasi bo‘lishi mumkin, — dedi Manuel Noyer. Uning so‘zlarini jurnalist Fabrisio Romano keltirgan.
Hozirgi shartnoma 2026 yil 30 iyungacha amal qiladi.
Manuel Noyer «Bavariya» safida 12 marta Germaniya chempioni bo‘lgan, besh marta mamlakat Kubogini va yetti marta Superkubokni qo‘lga kiritgan. Xalqaro maydonda esa ikki marta Chempionlar ligasi g‘olibi bo‘lgan, shuningdek UYEFA superkubogi hamda Klublar o‘rtasidagi jahon chempionatida ham zafar quchgan.













