Italiya milliy terma jamoasi nazariy jihatdan 2026 yilgi jahon chempionatida ishtirok etishi mumkin. Bu holat jamoaning Bosniya va Gersegovinaga qarshi o‘tish bahsidagi mag‘lubiyatiga qaramay yuzaga kelishi ehtimoli bor, deya xabar bermoqda Sports.kz (Eurosport manbasiga tayanib).

Manbaga ko‘ra, vaziyat Eron terma jamoasining AQSH bilan bo‘layotgan harbiy mojaro sabab turnirda ishtirok etishdan voz kechishi ehtimoli bilan bog‘liq. Agar jamoa musobaqadan bosh tortsa, bo‘sh o‘rin paydo bo‘ladi va uni FIFA to‘ldirishiga to‘g‘ri keladi.

Qoidalarga muvofiq, terma jamoani almashtirish bo‘yicha qarorni faqat FIFA qabul qiladi. Variantlardan biri — Osiyodan boshqa bir jamoani taklif qilish, ammo qit’alararo pley-off o‘tkazish ssenariysi ham ko‘rib chiqilmoqda.

The Athletic ma’lumotiga ko‘ra, FIFA saralashdan o‘ta olmagan jamoalar ishtirokida qo‘shimcha turnir tashkil qilishi mumkin. Bunday holda, FIFA reytingida 12-o‘rinni egallab turgan Italiya asosiy da’vogarlardan biriga aylanadi.

Qayd etilishicha, bunday amaliyot avval ham qo‘llangan. Masalan, o‘tgan yozda AQSHda bo‘lib o‘tgan klublar o‘rtasidagi jahon chempionatida «Leon» musobaqadan chetlatilgan va uning o‘rnini «Los-Anjeles» hamda «Amerika» o‘rtasidagi o‘tish bahsi orqali aniqlangan edi.

Shu bilan birga, bunday ssenariy ehtimoli past deb baholanmoqda. Qaror oldindan qabul qilinishi lozim: FIFA qoidalariga ko‘ra, agar terma jamoa birinchi o‘yinga 30 kundan kam vaqt qolganda musobaqadan chiqsa, unga taxminan 500 ming yevro jarima qo‘llaniladi. Shu sababli yakuniy qaror 13 maygacha ma’lum bo‘lishi kutilmoqda.

2026 yilgi jahon chempionati 11 iyundan 19 iyulgacha AQSH, Kanada va Meksikada bo‘lib o‘tadi.