"Yuventus" hujumchisi Ueston Makkenni jamoada yulduz portugaliyalik Krishtianu Ronaldu bilan birga o‘ynagan vaqtlarini yodga oldi. Ular 2020-21 yilgi mavsumda "keksa sinyora" tarkibida birga faoliyat yuritishgan.
"U bilan birga o‘ynash aql bovar qilmas darajada edi. Uni birinchi marta uchratganimda, uning professionalizmi haqidagi barcha gaplar haqiqat ekanini tushunganman. Biz o‘yinlardan tungi soat 3 da qaytardik va u uyiga ketish o‘rniga muzli vanna qabul qilardi", - deya Makkennining so‘zlarini keltiradi DAZN.
"Og‘ir o‘yindan keyingi kuni ertalab u sport zalida bo‘lar va har bir mushak guruhi ustida ishlardi. Bu haqiqat ekaniga ishonish uchun uni o‘z ko‘zingiz bilan ko‘rishingiz kerak edi", - deya qo‘shimcha qildi futbolchi.
"Yuventus"dagi uch mavsum davomida Ronaldu 134 ta o‘yinda maydonga tushib, 101 ta gol urdi va 22 ta golli uzatmani amalga oshirdi. Shuningdek, u jamoaning 5 ta sovrinni qo‘lga kiritishiga o‘z hissasini qo‘shdi.
