Chorshanba kuni Madridning «Real» klubi Chempionlar ligasi 1/4 finali doirasida «Bavariya»ga qarshi javob uchrashuvini o‘tkazadi.

«Qaymoqranglilar»ga Myunxenda faqat g‘alaba kerak — o‘tgan hafta ular o‘z maydonlarida 1:2 hisobida imkoniyatni boy berishgan edi. Diario AS nashrining ta’kidlashicha, muhim bahs oldidan «Real»da Eduardo Kamavinganing imkoniyatlariga shubha bilan qarala boshlandi: yarim himoyachining «Jirona»ga qarshi yaqin orada bo‘lib o‘tgan o‘yindagi harakatlari murabbiylar shtabida ijobiy taassurot qoldirmagan. Shu sababli, Orelyen Tchuameni diskvalifikasiya tufayli o‘yinni o‘tkazib yuborishiga qaramay, Kamavinga asosiy tarkibdagi joyidan mahrum bo‘lishi mumkin.

«Bavariya» — «Real» uchrashuvi Toshkent vaqti bilan soat 00:00 da boshlanadi. Ushbu juftlik g‘olibi yarim finalda «PSJ» yoki «Liverpul» jamoalaridan biri bilan kuch sinashadi.