Yaqindagi harbiy ziddiyatlar sababli to‘xtab qolgan Eron futbol chempionati qayta tiklanishi mumkin. Euroasia nashri ma’lumotiga ko‘ra, kamida ikki nafar xorijlik futbolchiga mamlakatga qaytish va jamoaga qo‘shilish bo‘yicha rasmiy taklifnoma yuborilgan.

Klublar yuborgan hujjatlarda o‘t ochishni to‘xtatish haqidagi kelishuvdan so‘ng vaziyat bosqichma-bosqich barqarorlashayotgani aytilgan. Shuningdek, klublar xavfsizlik masalasi to‘liq nazorat ostida ekaniga va barcha choralar tegishli tuzilmalar bilan muvofiqlashtirilganiga kafolat bermoqda. Garchi tayyorgarlik boshlangan bo‘lsa-da, chempionat taqdiri bo‘yicha yakuniy to‘xtamga kelinmagan. Eron futbol federasiyasi va klublar rahbariyati ikki xil ssenariyni ko‘rib chiqmoqda:

- Turnirni muddatidan oldin yakunlash;
- Mavsumning qolgan qismini davom ettirish.

Ushbu masala bo‘yicha rasmiy qaror 18 aprel kuni e’lon qilinishi kutilmoqda.

Vaziyat keskinlashgan pallada Eron hukumati xalqaro turnirlarni boykot qilish, hatto Jahon chempionatidan voz kechish ehtimoli haqida bayonotlar bergan edi. Biroq, bu tahdidlar rasmiy tus olmadi. Masalan, “Traktor” klubi Saudiya Arabistonida Elita Chempionlar Ligasi doirasidagi o‘yinini o‘tkazdi. Eron milliy terma jamoasi esa Shimoliy Amerikada o‘tadigan Jahon chempionatiga tayyorgarlikni boshlash arafasida turibdi.

Eslatib o‘tamiz, harbiy harakatlar boshlangan vaqtda Eronda jami 40 nafar legioner to‘p surayotgan edi. Isroil va AQSH hujumlari boshlangach, ular mamlakatni Turkiya, Ozarbayjon va BAA orqali shoshilinch tark etishga majbur bo‘lishgan. Ayrim futbolchilar klub yordamida, boshqalari esa chegaralarda soatlab navbat kutib, o‘z kuchlari bilan chiqib ketishgan.

Ma’lumot uchun, ayni paytda Eron chempionatida O‘zbekiston terma jamoasining 5 nafar futbolchisi — Rustam Ashurmatov (“Istiqlol”), Odil Hamrobekov (“Traktor”), Jaloliddin Masharipov (“Istiqlol”), Igor Sergeev (“Persepolis”) va Oston O‘runov (“Persepolis”) to‘p tepadi.