Superliganing 8-turida Olmaliqning OKMK jamoasi o‘z maydonida «Buxoro»ni qabul qildi va tomoshabop hamda dramatik ruhda kechgan bahsda 3:2 hisobida g‘alaba qozondi.

Uchrashuv juda faol va hujumkor ruhda boshlandi. Ilk daqiqalardanoq ikki jamoa ham ochiq futbol namoyish etdi. 5-daqiqada maydon egalari hisobni ochishga muvaffaq bo‘ldi — burchak to‘pidan so‘ng yuzaga kelgan vaziyatda Siavash Haqnazariy to‘pni darvozaga joylab, hisobni ochdi.

Oradan ko‘p o‘tmay, 12-daqiqada Mirjamol Qosimov jarima zarbasini aniq ijro etib, ustunlikni ikki baravarga oshirdi — 2:0.

Biroq mehmonlar tezda o‘yinga qaytishdi. 29-daqiqada burchakdan uzatilgan to‘pdan keyin Sherzod Esanov hisobni qisqartirdi. Oradan besh daqiqa o‘tib, o‘sha Esanov yana bir bor gol urib, hisobni tenglashtirdi — 2:2. VAR tekshiruvidan so‘ng gol inobatga olindi va birinchi bo‘lim shu hisobda yakunlandi.

Ikkinchi taymda OKMK tashabbusni o‘z qo‘liga olishga harakat qildi. Bir qator xavfli vaziyatlar yaratilganiga qaramay, uzoq vaqt gol urilmadi. Nihoyat, 77-daqiqada Nodirbek Abdurazzoqov havodagi uzatmadan so‘ng boshi bilan aniq zarba yo‘llab, jamoasini yana oldinga olib chiqdi — 3:2.

Qolgan daqiqalarda maydon egalari ustunlikni saqlab qolishga erishdi va muhim g‘alabani qo‘lga kiritdi. OKMK ushbu g‘alaba evaziga o‘z ochkolarini 11 taga yetkazib, jadvalda 7-o‘ringa ko‘tarilib oldi.

O‘zbekiston Superligasi, 8-tur
17 aprel 2026 yil. Olmaliq
OKMK — «Buxoro» 3:2 (2:2)
Gollar: Siavash Haqnazariy 5 (1:0), Mirjamol Qosimov 12 (2:0), Sherzod Esanov 29 (2:1), Sherzod Esanov 34 (2:2), Nodirbek Abdurazzoqov 77 (3:2)