19 aprel kuni bo‘lib o‘tgan o‘yinda «Bavariya» «Shtutgart»ni mag‘lub etdi (4:2) va muddatidan oldin Germaniya chempionligini qo‘lga kiritdi. Ushbu g‘alaba Myunxen jamoasi darvozaboni Manuel Noyerga chempionlik sovrinlari soni bo‘yicha sobiq jamoadoshi Tomas Myullerga yetib olish imkonini berdi. Endi har ikki futbolchi hisobida 13 tadan chempionlik tituli bor, deb xabar bermoqda Bundesliga matbuot xizmati.
Manuel Noyer 2011 yilning iyulida «Bavariya»ga o‘tgan edi. Uning debyut mavsumi sovrinsiz yakunlangan, shundan so‘ng u ketma-ket 11 ta chempionlikni qo‘lga kiritgan jamoaning asosiy futbolchisiga aylandi.
2024 yilda Xabi Alonso boshqaruvidagi «Bayer» «Bavariya»ni ortda qoldirib, birinchi o‘rinni egallagan edi, biroq keyingi ikkita chempionlikni yana myunxenliklar o‘zlariniki qilishdi.
Tomas Myuller 2024-25 yilgi mavsum yakunida «Bavariya»ni tark etgan va hozirda MLS’da «Vankuver Uaytkeps» jamoasi sharafini himoya qilmoqda. Noyerning «Bavariya» bilan shartnomasi esa joriy mavsum oxirida o‘z nihoyasiga yetadi.
