19 апрель куни бўлиб ўтган ўйинда «Бавария» «Штутгарт»ни мағлуб этди (4:2) ва муддатидан олдин Германия чемпионлигини қўлга киритди. Ушбу ғалаба Мюнхен жамоаси дарвозабони Мануэль Нойерга чемпионлик совринлари сони бўйича собиқ жамоадоши Томас Мюллерга етиб олиш имконини берди. Энди ҳар икки футболчи ҳисобида 13 тадан чемпионлик титули бор, деб хабар бермоқда Бундеслига матбуот хизмати.
Мануэль Нойер 2011 йилнинг июлида «Бавария»га ўтган эди. Унинг дебют мавсуми совринсиз якунланган, шундан сўнг у кетма-кет 11 та чемпионликни қўлга киритган жамоанинг асосий футболчисига айланди.
2024 йилда Хаби Алонсо бошқарувидаги «Байер» «Бавария»ни ортда қолдириб, биринчи ўринни эгаллаган эди, бироқ кейинги иккита чемпионликни яна мюнхенликлар ўзлариники қилишди.
Томас Мюллер 2024-25 йилги мавсум якунида «Бавария»ни тарк этган ва ҳозирда MLS’да «Ванкувер Уайткэпс» жамоаси шарафини ҳимоя қилмоқда. Нойернинг «Бавария» билан шартномаси эса жорий мавсум охирида ўз ниҳоясига етади.
