20 aprel kuni San-Sebastyan ko‘chalariga qariyb 100 ming kishi yig‘ilib, Ispaniya Kubogidagi g‘alabadan so‘ng «Real Sosyedad» jamoasini tantanali ravishda kutib oldi. Bu haqda Mundo Deportivo nashri xabar bermoqda.

Bayram tadbirlari shahar markazidagi ratusha binosi oldida boshlandi, so‘ngra ochiq avtobus kubokni «Anoeta» stadioniga qadar olib bordi.

Tantananing eng yorqin lahzalaridan biri jamoa bosh murabbiyi Pellegrino Matarrassoning zavqlangan olomon oldida bask tilida nutq so‘zlashi bo‘ldi.

Bayram tadbiriga Mikel Oyyarsabal va himoyachi Aris Elustondo boshchilik qilishdi. Bu ikki faxriy futbolchi 2021 yilda ham Kubokni qo‘lga kiritishgan, biroq o‘shanda pandemiya sababli g‘alabani muxlislar bilan birga nishonlash imkoniga ega bo‘lishmagan edi.

Elustondo muxlislarga qarata, Oyyarsabal «Real Sosyedad»da sodir bo‘layotgan barcha ezgu ishlar uchun eng katta mas’ul shaxs ekanini aytdi. Kapitan ham unga munosib javob qaytardi. «U hatto maydonga tushmaydigan kunlarida ham xuddi asosiy tarkibda tushgandek tabassum bilan keladi, bu esa kiyinish xonasida juda muhim», — dedi Oyyarsabal. Bu so‘zlardan Elustondoning ko‘zlariga yosh keldi.

Ratusha oldida 40 ming kishi to‘plangan bo‘lsa, yana 60 ming kishi avtobus harakatlangan yo‘nalish bo‘ylab saf tortdi. Ma’lumot uchun, shahar aholisi 190 ming kishini, butun Gipuskoa mintaqasi aholisi esa 700 ming kishini tashkil qiladi.

Eslatib o‘tamiz, Ispaniya Kubogi finalida «Real Sosyedad» «Atletiko Madrid»ni mag‘lub etgan edi (asosiy vaqt 2:2, penaltilar bo‘yicha 4:3).